სასჯელაღსრულების, პრობაციისა და იურიდიული დახმარების საკითხთა სამინისტროს იურიდიული დახმარების სამსახურის ადვოკატებმა დღეს სასტუმრო ”ვერე პალასში” ფსიქიატრიული ექსპერტიზის საკითხებზე იმსჯელეს. დისკუსია გახსნეს იურიდიული დახმარების სამსახურის დირექტორმა - ირაკლი კობიძემ და ევროკავშირის ”კანონის უზენაესობის მხარდაჭერის” პროექტის მენეჯერმა - ირინა ლორთქიფანიძემ. ღონისძიება გაიმართა ”კანონის უზენაესობის მხარდაჭერის პროექტის” ფარგლებში, რომელსაც ევროკავშირის მხარდაჭერით ავსტრიული საკონსულტაციო კომპანია Human Dynamics ახორციელებს.

დისკუსიას სასამართლო ექსპერტიზის ეროვნული ბიუროს ფსიქიატრიული ექსპერტიზის სამსახურის უფროსი - დავით მაღრაძე უძღვებოდა. მასთან ერთად საზოგადოებრივმა ადვოკატებმა განიხილეს ფსიქიატრიული ექსპერტიზის ისეთი საკითხები, როგორებიცაა შეზღუდული შერაცხადობა, ფსიქიკური დაავადების ხასიათის განსაზღვრა, სასამართლო პროცესზე დასწრებისა და აღქმის უნარი, პირის მიერ საქმის მწარმოებელი ორგანოსათვის სწორი ჩვენების მიცემის შესაძლებლობა, გონებრივი განვითარების განსაზღვრა, ფიზიოლოგიური აფექტის მდგომარეობა, დანაშაულის ჩადენისას ქმედების რეალურად და სრულად გაცნობიერების შესაძლებლობა.

აღსანიშნავია, რომ სისხლის სამართლის საპროცესო კოდექსის თანახმად, პროცესის მწარმოებელ ორგანოს უფლება არა აქვს მიიღოს ეჭვმიტანილის, ბრალდებულის, განსასჯელის უარი დამცველის დანიშვნაზე, თუ პირს აქვს ფიზიკური ან ფსიქიკური ნაკლი, ან ფსიქიკური დაავადება, რომელიც აძნელებს დაცვის უფლების განხორციელებას. ასეთ შემთხვევებში ხდება პირის იძულებით დაცვა, რასაც იურიდიული დახმარების სამსახურის ადვოკატები უზრუნველყოფენ. გასულ წელს იურიდიული დახმარების სამსახურმა წარმოებაში 9291 საქმე მიიღო. მათგან 12%-ს სწორედ ფსიქიატრიული მკურნალობის იძულებით შეფარდების საქმეები შეადგენდა. 

შეგახსენებთ, რომ სასჯელაღსრულების, პრობაციისა და იურიდიული დახმარების საკითხთა სამინისტროს იურიდიული დახმარების სამსახური მოქალაქეებს უფასო საადვოკატო მომსახურებასა და სამართლებრივ კონსულტაციებს უწევს. სამსახურის 11 ბიურო და 2 საკონსულტაციო ცენტრი თბილისში, მცხეთა-მთიანეთში, კახეთში, ქვემო ქართლში, შიდა ქართლში, სამცხე-ჯავახეთში, იმერეთში (ქუთაისი, ზესტაფონი), სამეგრელოში (ზუგდიდი, ფოთი), რაჭა-ლეჩხუმში, გურიასა და აჭარაში ფუნქციონირებს.

[იურიდიული დახმარების

სამსახურის საზოგადოებასთან

ურთიერთობების მენეჯერი

გიორგი სელიმაშვილი]