NDI-ის კვლევების მიხედვით, პატრიარქის შემდეგ ყველაზე მეტად გიგი უგულავა მოსწონთ.  

 “ნაციონალური მოძრაობის” თბილისის მერობის კანდიდატს ამ კვლევების თანახმად, თავისი პარტიის ლიდერსა და ქვეყნის პრეზიდენტზე, მიხეილ სააკაშვილზე მეტი რეიტინგი აქვს. 

 კვლევის თანახმად, რომელიც “ინტერპრესნიუსმა” მოიპოვა, სრულიად საქართველოს კათოლიკოს-პატრიარქს, უწმინდესსა და უნეტარეს ილია მეორეს საქართველოში ყველაზე მაღალი რეტინგი აქვს (90 პროცენტი). მას 30 პროცენტით ჩამორჩება გიგი უგულავა, რომელიც გამოკითხულთა 60 პროცენტს მოსწონს (არ მოსწონს 19 პროცენტს). 

პრეზიდენტი მიხეილ სააკაშვილი უგულავას 2 პროცენტით ჩამორჩება და გამოკითხულთა 58 პროცენტს მოსწონს, პრეზიდენტი არ მოსწონს 22 პროცენტს. 

 NDI-ის რეიტინგში სხვა ქულები და ადგილები ასეა განაწილებული: გიორგი თარგამაძე -57 პროცენტი, ინგა გრიგოლია – 46, სოზარ სუბარი – 42, ირაკლი ალასანია – 40, დავით ბაქრაძე – 37, შალვა ნათელაშვილი 31 და ა.შ. 

 აღნიშნული კვლევა აშშ-ს ეროვნულ-დემოკრატიული ინსტიტუტის (NDI) დაკვეთით, კავკასიის კვლევითი რესურსების ცენტრმა 11-26 აპრილს ჩაატარა. ამ პერიოდისთვის, საქართველოს მასშტაბით, 2 337 ადამიანი გამოიკითხა. კვლევა არჩევნების მიმართ საზოგადოების დამოკიდებულებას ეხება.