ბოლო პერიოდში სოციალურ ქსელ ,,Facebook" -ში საკმაოდ მომრავლდა საქართველოს პრეზიდენტ მიხეილ სააკაშვილის პროფილები, ეს აღნიშნული სოციალური ქსელის მომხარებელთა დაბნეულობას იწვევს, რაც გამოქვეყნებულ კომენტარებშიც იკითხება. საქართველოს პრეზიდენტის გვერდების რაოდენობა ,,Facebook"-ში ათს
უტოლდება. ერთ-ერთ მათგანზე, განსაკუთრებული აქტიურობა შეინიშნება -
პრეზიდენტის პროფილს ათასზე მეტი მეგობარი ჰყავს, „ფრენდები"
პრობლემატურ თემებზე, მაგალითად, სოციალურ საკითხებზე, უამრავ კითხვას
სვამენ, რაზეც საკმაოდ კვალიფიციურ პასუხებს ღებულობენ.

აღნიშნულ გვერდზე მითითებულია, რომ ამ სერვისით სარგებლობს როგორც
პრეზიდენტი, ასევე მისი ადმინისტრაცია, თუმცა პრეზიდენტის პრესსპიკერი
მანანა მანჯგალაძე ამბობს, რომ სოციალურ ქსელში გახსნილი არც ერთი
პროფილი პრეზიდენტის არ არის.

,,პრეზიდენტსა და მის ადმინისტრაციას არანაირი კავშირი არ აქვს ამ გვერდებთან", განუცხადა Media.Ge-ს მანანა მანჯგალაძემ.
Media.Ge შეეცადა დაკავშირებოდა ხსენებული გვერდების ავტორებს და
გაეგო, თუ რა მიზნით შექმნეს მათ მიხეილ სააკაშვილის ეს პროფილები, თუმცა პასუხი ვერც ერთ კითხვაზე ვერ მიიღო.

საგულისხმოა, რომ ,,Facebook"-ში გახსნილია მიხეილ სააკაშვილის ორი ფანგვერდიც, ერთ-ერთ მათგანს 3 ათასზე მეტი ფანი ჰყავს.

media.ge