"არ მინდა მუქარის ტონით გამომივიდეს, მაგრამ ხალხის ამ მდგომარეობაში ჩაყენება შეიძლება ძალიან მძიმედ შემოუბრუნდეს ხელისუფლებას. ამ სიტუაციაში არჩევნებში ხელისუფლებას ხალხი ხმას არ მისცემს", - აცხადებს "ქრისტიან-დემოკრატების" საკრებულოს თავმჯდომარეობის კანდიდატი ინგა გრიგოლია, რომელიც ამბობს, რომ არჩევნების შემდეგ პრეზიდენტ სააკაშვილს საკრებულოში მისვლაც ბევრჯერ მოუწევს და მწვავე კითხვებზე არაერთხელ პასუხის გაცემაც.

"რეზონანსი" როგორ მიდის საარჩევნო კამპანია, მწვავე განცხადებებით არ გამოირჩევით...
ინგა გრიგოლია: ძალიან სერიოზული პროცესი მიდის, დღეში 3-4 შეხვედრა მაინც გვაქვს მოსახლეობასთან და ამით ვართ დაკავებული. ერთია, როდესაც გამოდიხარ სატელევიზიო განცხადებებით და მეორეა უშუალოდ გაქვს ხალხთან შეხება. მოსახლეობა არის უმძიმეს დღეში. ერთია, რასაც ხელისუფლება ამბობს და ესაა ფასადური პოლიტიკა, მაგრამ მეორეა როდესაც გახვალ ქუჩაში უმძიმეს პრობლემებს ხვდები.

"რ": მას შემდეგ რაც "ქრისტიან-დემოკრატებს" შეუერთდით, ხომ არ ჩატარებულა გამოკითხვა და როგორია თქვენი რეიტინგი?
ი.გ: მე არასოდეს დავინტერესებულვარ რეიტინგებით, ტელევიზიაში მუშაობის დროსაც კი, თუკი რაიმე ოფიციალური მონაცემი არ დაიდებოდა არც ვკითხულობდი. რეიტინგი არის ჩემთვის ის, რომ ჩვენს ყოველდღიურ შეხვედრებს ესწრება უამრავი ადამიანი. რაც არ უნდა ამომრჩევლებზე ზეწოლა მიდიოდეს და ამის შესახებ მოსახლეობა გვაწვდის ინფორმაციებს და მიუხედავად ამისა ძალიან ბევრი ადამიანი გამოდის შესახვედრად და სწორედ ეს განსაზღვრავს რეიტინგს. ყველას აინტერესებს რამდენად რეალურია ის დაპირებები რაც გვაქვს.

"რ": თუ იგრძნობა კონკურენციის მომენტი?
ი.გ: არაა. გულწრფელად მინდა გითხრათ, რომ არ იგრძნობა. ყველასგან განსხვავებით ჩვენს მოძრაობას აქვს შეთავაზებული ისეთი საარჩევნო პროგრამა, რომელსაც მართალია აკრიტიკებენ, მაგრამ კონკურენციას ვერ უწევენ.

"რ": თუმცა "ქრისტიან-დემოკრატების" საარჩევნო პროგრამას უკვე უწოდეს არარეალური...
ი.გ: როდესაც გედავებიან იმაზე, რომ რაღაც არ არის რეალური, გაიხსენეთ იგივე შაჰ-დენიზის კონსორციუმთან გაფორმებული ხელშეკრულებები, რაზეც გია ჭანტურია მუშაობდა წლების განმავლობაში, სწორედ ესაა საფუძველი და ამითაა განსაზღვრული ის ტარიფები, რასაც ხალხს ვთავაზობთ. რა არის არარეალური, რომ გაზის ან დენის ტარიფი დაბალი რომ უნდა იყოს? ის, რომ დენის თვითღირებულება 2 თეთრია და ჩვენ 17 თეთრს ვიხდით, ესაა არარეალური? ეს უნდა ვამტკიცოთ? როდესაც ასეთი სერიოზული სოციალური პროგრამა იდება, ეს არ შეიძლება იყოს კონკურენტული. ასევე, როდესაც საუბრობთ, რომ მწვავე განცხადები არ კეთდება ჩემი მხრიდან, თავად ეს შეხვედრები არის ძალაინ მწვავე. გუამრავი ადამიანი მოდის და ტირის, რომ წამლის ფულად არ ყოფნის შემოსავალი. მე კარგად ვიცი როდის შეიძლება სატელევიზიო განცხადებების დონეზე აკრიტიკო ხელისუფლება. ძალიან მნიშვნელოვანია, რომ მოსახლეობამ დაიჯეროს, ის რასაც ჩვენ ვთავაზობთ რეალობაა.

"რ": ჯერ ხელისუფლებას არ აქვს გადაწყვეტილი, თუ ვის წარადგენს ამ არჩევნებზე კანდიდატებად. ვის ელოდებით კონკურენტად?
ი.გ: ძალიან მნიშვნელოვანია ეს თემა. როდესაც ოპოზიცია პრეტენზიებს გამოთქვამს "ქრისტიან-დემოკრატების" მისამართით, ჩვენ მიგვაჩნია, რომ კონკურენტი არის ხელისუფლება, რადგან ის, რაც ხელისუფლებამ ვერ გააკეთა, ჩვენ ვაპირებთ ამის გაკეთებას. ძალიან მნიშვნელოვანია ვის დაასახელებენ, არსებობს წინასწარი ინფორმაცია, თუმცა, ვიდრე არ არის ფაქტი, ძალიან ძნელია ამაზე ისაუბრო.

არის საუბარი, რომ შესაძლოა ეს იყოს ქალბატონი რუსუდან კერვალიშვილი. როდესაც საარჩევნო სია დაიდება, მერე შეიძლება ამაზე ლაპარაკი. თუმცა, ჩვენი პროგრამა საშიშია იმ ხელისუფლებისთვის, რომელიც რევოლუციის წინ დაჰქროდა და ხალხს ჰპირდებოდა 100 დოლარიან პენსიას, ზღაპრულ ცხოვრებას და სინამდვილეში მივიღეთ ის, რაც დღეს გვაქვს. უბნებში, სადაც ხალხი ნაკლებად ჩანს კამერების წინ, იქ უნდა მიხვიდეთ და ნახოთ რა დღეში არიან. ერთ-ერთი გოგონა მიყვებოდა, კარგია რომ ვაკე და საბურთალო გაანათეს, მაგრამ მე იქ დიდი ხანია არ ვყოფილვარო.

"რ": თქვენი ნათქვამიდან გამომდინარე, ანუ ოპოზიციაში კონკურენტად არავის განიხილავთ?
ი.გ: ჩვენს მთავარ კონკურენტად ხელისუფლებას განვიხილავ. რაც შეეხება ოპოზიციას, ვისურვებდი ძალიან ბევრი ოპოზიციონერი ვიხილო ამ საკრებულოში. ჩვენი ხმების გაერთიანება იქნება იმის საფუძველი, რომ ოპოზიციონერი თავმჯდომარე ვიხილოთ საკრებულოში. ხელისუფლების საყვარელი გამონათქვამია, რომ ოპოზიცია ლაპარაკობს და ისინი საქმეს აკეთებენ, საქმიანი პროგრამა ახლა თუ კი ვინმემ დადო ესაა გია ჭანტურია. თუ ის მერი გახდება, ყველა მაქსიმალურად ვიშრომებთ და ამომრჩეველს დაპირებას შევუსრულებთ.

საქმიანი შეთავაზებების კუთხით შეგიძლიათ მითხრათ სხვა რომელი პოლიტიკური პარტიები იქცევიან ანალოგიურად? ხელისუფლება ამბობს, რომ ხალხის ცხოვრება გააუმჯობესა, რეალურად კი ხალხს ბეგარად აწევს გადასახადები. როდესაც ხალხი ტირის და მოდის შენთან, გეუბნება შიმშილის ზღვარზეა, ამაზე მეტი სიმწვავე არ არსებობს. მე ბევრჯერ ცუდადაც კი გავხდი, როდესაც ასეთი სურათი ვნახე.

"რ": გამომდინარე თქვენი რეიტინგიდან, მერობის კანდიდატი რომ ყოფილიყავით უგულავას დაამარცხებდით?
ი.გ: მე ვთვლი, რომ ჩვენი მერობის კანდიდატიც კი დაამარცხებს გიგი უგულავას, არათუ ინგა გრიგოლია. თბილისში სააკაშვილმა წააგო, ცალკე აღებული გიგი უგულავა არ არსებობს, ისაა სახელისუფლებო გუნდის წევრი, იმ გუნდის, რომელმაც წააგო თბილისი. მას შემდეგ შეიცვალა რამე? დაემატა ომი და კიდევ უფრო მეტი უსამსახუროდ დარჩენილი ადამიანი. მე მაქვს დიდი იმედი, რომ გავიმარჯვებთ. როდესაც ადამიანს ჰპირდები იმას, რომ გადასახადებს, რაზეც მისი შემოსავლების 70 პროცენტზე მეტი იხარჯება, შეუმსუბუქებ, ამაზე უკეთესი რა უნდა შესთავაზო. აღარაფერს ვამბობ დემოკრატიული ღირებულებების პრობლემებზე, ქვეყანაში სახეზეა ძალიან მძიმე სოციალური და ეკონომიკური მდგომარეობა, არ მინდა მუქარის ტონით გამომივიდეს, მაგრამ ხალხის ამ მდგომარეობაში ჩაყენება შეიძლება ძალიან მძიმედ შემოუბრუნდეს ხელისუფლებას. ამ სიტუაციაში არჩევნებში ხელისუფლებას ხალხი ხმას არ მისცემს.

"რ": დიდი ხანია კამათი არ ცხრება რუსეთის თემაზე, ოპოზიციის ერთი ნაწილი უკვე ძალიან ხშირად დადის რუსეთში, თქვენ რომ შემოგთავაზონ წახვალთ?
ი.გ: მე არ მიმაჩნია, რომ შედეგიანი იქნება ოპოზიციის კრემლში ჩასვლა. თუ ვინმეს სურს ასეთი პოლიტიკა, ეს მათი არჩევანია. ძალიან მაღიზიანებს განცხადებები რუსეთის აგენტებზე და ამის წინააღმდეგი ვიყავი, თუკი სახეზე გვაქვს ფაქტები მაშინ დავდოთ. როდესაც ოპოზიციონერი ლიდერები ჩადიან რუსეთში ესაა მათი პოლიტიკა და მე მიმაჩნია, რომ შედეგობრივად არაფერი შეიცვლება. თუმცა, მოდით ვაღიაროთ, რომ ეს პრობლემა საქართველოს ხელისუფლებამ შექმნა, მაგრამ ეს უნდა გადაჭრას ახალმა ხელისუფლებამ და არა ოპოზიციამ.

"რ": საზოგადოების ერთი ნაწილი ეჭვობს, რომ ეს ვიზიტები ფინანსურ დაინტერესებას უკავშირდება...
ი.გ: მე თავს შევიკავებ შეფასებისგან. ცალკეული ქმედებები შეიძლება უკავშირდებოდეს ფინანსებს, მაგრამ მე არ მინდა დავაკავშირო ოპოზიციის ურთიერთობა რუსეთთან მხოლოდ ფინანსურ მოტივებთან. და თუ ეს არის ფინანსური დაინტერესება ეს ხელისუფლებამ და გამოძიებამ უნდა დაამტკიცოს. ეს არის ის ხელისუფლება, რომელიც როდესაც ჩვენ ვლაპარაკობთ გვისმენს და თუკი ვინმეს ფული შემოაქვს კრემლიდან, ადგენენ და დადონ ეს ფაქტები.

"რ": ასევე მინდა გკითხოთ მედიაში შექმნილ ვითარებაზეც. უკვე რამდენიმე თვეა ჟურნალისტურ საქმიანობას აღარ ეწევით, ამ გადმოსახედიდან როგორ აფასებთ?
ი.გ: განსაკუთრებით მინდა ვთქვა, რომ პრესა არის თავისუფალი უფრო მეტად, ვიდრე ეს იყო რევოლუციის შემდგომი ბევრი წლის განმავლობაში. პრესა ყოველთვის ცდილობდა თავისუფლების ხარისხი არ დაეკარგა. რაც შეეხება ტელევიზიას, წინა წლებთან შედარებით, ვგულისხმობ რევოლუციის შემდგომ პერიოდს, სიტუაცია შეიცვალა და დღეს გაქვს შესაძლებლობა მიხვიდე და პირდაპირ ეთერში დაჯდე. იგივე "კავკასიისა" და "მაესტროს" არსებობა ამის ნათელი მაგალითია.

"რ": მოდელირებულ "ქრონიკასთან" დაკავშირებით როგორია თქვენი რეაქცია?
ი.გ: ჩემი ოჯახი იყო იგივე შოკში და იყო დაზაფრული, როგორც სხვა ოჯახები. ეს ჩემს პოზიციაზე უკვე მეტყველებს.

"რ": ნათია კობერიძის ადგილას რომ ყოფილიყავით, მოდელირებულ "ქრონიკას" წაიყვანდით?
ი.გ: მე ჟურნალისტების შეფასებისგან თავს შევიკავებ, მაგრამ თუ ნათია კობერიძე საჭიროდ თვლიდა, რომ უნდა წაეყვანა ეს გადაცემა, უფრო მეტი განმარტებები უნდა ყოფილიყო. მე კატეგორიულად მოვითხოვდი, რომ ყოფილიყო ტიტრი. ამის გაშვება ტიტრის გარეშე არ შეიძლებოდა. სწორედ ის ერთი ტიტრი განსაზღვრავდა ამ ტელეკომპანიის მიმართ ნდობის ფაქტორს.

"რ": არჩევნების მოახლოებასთან ერთად კომპრომატების ომი იწყება ხოლმე, თუ ელოდები მსგავის სახის დარტყმებს?
ი.გ: ვერ გეტყვით, რომ რაიმე კომპრომატი შეიძლება არსებობდეს, რომელიც მე დარტყმას მომაყენებს. არ მგონია ვინმეს ჰქონდეს რაიმე ისეთი, რასაც ჩემ წინააღმდეგ გამოიყენებენ.

"რ": და პირიქით?
ი.გ: მე არ ვაპირებ კომპრომატებით ბრძოლას, მიუხედავად იმისა, რომ მაქვს ძალიან ბევრი ინფრომაცია. პოლიტიკურ ბრძოლაში მე კომპრომატებით ომს გამოვრიცხავ. არ ვაპირებ დებატებს ოპოზიციასთან, ამით იგებს ხელისუფლება, როდესაც ხალხს აჩვენებს რა დღეშია ოპოზიცია. მე ვთვლი, რომ ჩვენ გვაქვს იმდენად სერიოზული პროგრამა, რომ ეს არც გვჭირდება.

"რ": როგორ ფიქრობ, ხელისუფლების #1 დაგიჯდება დებატებში?
ი.გ: არ ვიცი. ვინც არ უნდა იყოს, თუნდაც რუსუდან კერვალიშვილი, რომელიც ჩემი მეგობრის დედაა და ოჯახებით ვახლობლობთ, ისიც თუ დასახელდა, ამ შემთხვევაშიც ვარ მზად, რომ მასთან ერთად დებატები გავმართო. რადგან ის იქნება პოლიტიკურად პასუხგამცემი პირი ამ არჩევნების დროს.

"რ": და მაინც, საზოგადოების ერთი ნაწილი თვლის, რომ "ქრისტიან-დემოკრატები" არის ხელისუფლების სატელიტი პარტია. ინგა გრიგოლიას პოლიტიკაში გადაყვანა ხომ არ ემსახურებოდა იმას, რომ თქვენ ჟურნალისტიკიდან ჩამოეშორებინეთ?
ი.გ: ის კითხვები, რასაც მე წლების მანძილზე ვსვამდი, არის იმის გარანტია, რომ მე მივცე ადამიანებს პირობა, რომ თუ პოლიტიკაში მოვალ ასმაგად მწვავე ვიქნები. მე არ მითამაშია აქამდე არავის თამაში და ახლა პოლიტიკაში ამას არ ვაპირებ. თუ ვინმეს სურს, რომ დაგიჯეროს, დაიჯერებს თუ არადა ისევე ჩაგრეცხავენ, როგორც ეს სააკაშვილმა დააკანონა. ვისაც რა უნდა ის იჭორაოს, მე ამომრჩეველს დავანახებ რისი თავი მაქვს. ჩვენ გვაქს სერიოზული ამბიცია, რომ ხელისუფლება დავამარცხოთ.

"რ": აპირებთ პრეზიდენტ სააკაშვილის საკრებულოში მოწვევას? ან ღია კითხვების გაგზავნას ხომ არ გეგმავთ?
ი.გ: არ მიფიქრია, თუმცა ჯერ არჩევნებია მოსაგები და მერე სააკაშვილი მიიღებს იმაზე მწვავე ოპოზიციურ საკრებულოს, ვიდრე თვითონ ოდესღაც ხელმძღვანელობდა. ერთხელ კი არა, ათი ათასჯერ მოვიწვევთ და მოუწევს იმ შეკითხვებზე პასუხის გაცემა, რომელიც მის მიმართ არსებობს.

[გიორგი ფუტკარაძე, გაზეთი ”რეზონანსი”]