„ნაღდად, დავით აღმაშენებელი ხართ, ბატონო პრეზიდენტო!“-ეს მარგალიტები ანაკლიელმა გელა ჭანტურიამ მაშინ გადმოყარა, როცა მიხეილ სააკაშვილის „წინა–მძღოლობით“ ანაკლია-განმუხურის დამაკავშირებელი ხიდი მანქანით გადაკვეთა. პრეზიდენტის „სადიდებელი“ მას მაშინვე „დაუფასდა“ და სააკაშვილმა ჭანტურიას ძეგლის აღმართვის პირობა დადო. ძალიან მალე, მას ალბათ ხიდის ერთ ბოლოში ვიხილავთ. ამაში ეჭვი ნურავის შეეპარება, რადგან პრეზიდენტი მიცემულ პირობას ყოველთვის ასრულებს. 5 წლის წინ ჭანტურიასთვის შეპირებული ხიდიც ხომ გაიდო ენგურზე?!...

იმ რეპორტაჟის მიხედვით, რაც თითქმის მთელმა მსოფლიომ ტელეეკრანებზე იხილა, ჭანტურიას თავი „ზღაპარში“ ჰგონია „რა“, „ასეთი რამ თუ მოხდებოდა ნაღდად, ხომ ვერავინ წარმოიდგენდა რა?“ ამ ფრაზების შემდეგ კადრში ისმის მასპინძლის ხმა: „წარმოუდგენელი იყო, რომ ამ მოკლე პერიოდში მოესწრებოდა და გაკეთდებოდა ეს. ნაღდად, დავით აღმაშენებელი ხართ, ბატონო პრეზიდენტო!“ სატელევიზიო გამოცდილების მქონე ჟუნალისტი კი არა, დაკვირვებული თვალ-ყურიც ადვილად მიხვდებოდა იმას, რომ ეს წინადადება მონტაჟის შედეგად „ჩაკვეხებული“ იყო იმ დიალოგში, რომელსაც პრეზიდენტის პირადი ოპერატორი „ექსკლუზიურად“ იწერდა, რადგან ხმის დიაპაზონი აშკარად განსხვავდება მომდევნო ფრაზებისგან...

საიტერესოა, ამ „სპეცინტერვიუს შექმნის“ დეტალებიც. აშკარა იყო, რომ პრეზიდენტის „პიარსამსახური“ სააკაშვილის ხიდზე მისვლისთანავე ბრინჯივით დაიბნა, რადგან ქვეყნის პირველმა პირმა წითელ ბალიშზე ლენტის გასაჭრელად განლაგებული მაკრატლები გოგონას უკან მიაჩეჩა და ავტომანქანის საჭეს თავად მიუჯდა. დაუგეგმავმა სცენარმა მოვლენათა განვითარება რამდენიმე წუთით შეაფერხა. სააკაშვილის მანქანაში ამ დროს გელა ჭანტურიასთან ერთად ათიოდე წლის თამარ გამისონიაც ჩასვეს, მაგრამ კადრში აღარ გამოუჩენიათ მესამე მგზავრი, ხანდაზმული მამაკაცი. როგორც ამბობდნენ, იგი გალის რაიონში მცხოვრები ქართველი იყო, რომელიც უკან დაბრუნებულზე მოსალოდნელ პრობლემებს მოარიდესო...

მიხეილ სააკაშვილმა ანაკლია უკომენტაროდ დატოვა. მისი მოპოვება ვერც იმ „სამთავრობო“ ტელევიზიების ჟურნალისტებმა მოახერხეს, რომლებიც მის დაბრუნებას ხიდის ერთ ბოლოში ელოდებოდნენ. „პრესა. გე“-მ კი „საზეიმო“ ვითარებაში რამდენიმე კადრი გადაიღო და ანაკლიის ის მოსახლეობა ჩაწერა, რომელიც პრეზიდენტს „მიშა, მიშას!“ სკანდირებითა და ხვევნა-კოცნით თავბრუს ახვევდა. ქოლგის ჩრდილს ამოფარებული ქალბატონები, რომლებიც დარწმუნებულები იყვნენ იმაში, რომ ხიდი სოხუმში კი არა სოჭამდე მიიყვანდა, ადგილობრივმა ძალოვანებმა მოგვიანებით, „პრესა.გე“-ს წინააღმდეგ „დაგეშეს“. თუმცა, ყველასგან მოულოდნელად, „ოპოზიციურად განწყობილი ჟურნალისტი „განსაცდელისაგან“ შსს ერთ-ერთმა მაღალჩინოსანმა იხსნა და „დამსწრეებს“ დამოუკიდებელი ჟურნალისტის მიმართ თავის დანებება ურჩია.

წარსულში „ზვიადისტი“, ახლა კი „მიშისტი“ ქალბატონები პოლიტიკურ განცხადებებს კამერის გარეშეც აკეთებდნენ და „მიშას ნაღვაწით“ დაუნახავ ოპოზიციას დაბრმავებულ და დაყრუებულ მასად მოიხსენიებდნენ.

დიდი მცდელობის მიუხედავად „პრესა.გე“-მ ანაკლია-განმუხურის საზღვართან განსხვავებული მოსაზრებები ვერ მოისმინა. სამაგიეროდ, სოფლის ორღობეში ერთი, მეტად მნიშვნელოვანი ინტერვიუ ჩაწერა. მართალია, ვინაობის არ გამხელის პირობით, მაგრამ დიდი გულწრფელობით: „თქვენ გგონიათ ამ ტაშ-ფანდურს მიშას სიყვარულით მართავენ?! ხალხი მართლა ბრმაა. ამათ იმის ეშინიათ, მიშა გზას არ გაგვიკეთებს და შუქს არ მოგვცემსო, მაგრამ ის დენიც აფხაზეთიდან რომ შემოდის და ჩვენგან აკრეფილი ფული აფხაზის ჯიბეში რომ ჩადის, არ იცის ვითომ მიშამ? აფხაზები და რუსები რომ შემოგვესივნენ 2008-ში და გაგვძარცვეს, ამათი სამალავი ვერსად მოიძებნა. ეს ქობალიას რწმუნებული, ჯონი მიშველია, ახლა რომ გაიძახის ხმა „ნაციონალებს“ მიეცით თორემ აქ არ დაგაყენებთო, სად იმალებოდა ნეტავი ინტერვენციის დროს? გასაძევებელი და დასაჭერი ისაა, ხალხს რომ მუქარით არ ასვენებს.

ომის მერე კომპენსაცია რომ გამოგვიყო მსოფლიო ბანკმა თუ ვიღაცამ, ყველას რატომ არ მისცეს? თავისიანებს დაურიგეს და თვითონ ჩაიჯიბეს. აქცია გავმართეთ ხიდთან და ჟურნალისტები არ გაგვაკარეს. სანამდე დამალავენ ამ ყველაფერს?! ვისაც ბუნგალო აქვს სანაპიროზე, ის დაკანკალებს „ნაცმოძრაობას“, ვაითუ გაგვინაწყენდნენ და წაგვართვანო. ფულია ამათთვის მთავარი, ვერა და ვერ გაძღნენ...“

სააკაშვილმა ხიდთან ერთად ანაკლიაში იმ დღეს „პატრიოტთა ბანაკიც“ საზეიმოდ გახსნა. „ცერემონიალზე“ დასწრების პატივი, როგორც ჩანს, მხოლოდ განსაკუთრებულ სტუმრებს ჰქონდათ. ადგილობრივ ჩინოვნიკებთან ერთად „სამთავრობო“ კადრებში შიდა ქართლის გუბერნატორი, „მარად ახალგაზრდა პატრიოტი“ ლადო ვარძელაშვილი ჩანდა...

ანაკლია-განმუხურში მალე ალბათ მიხეილ სააკაშვილის „გმირობანზე“ ლექსებსაც დაწერენ და სიმღერასაც მიუძღვნიან. „ნაღდად“, არ არის გამორიცხული ვინმეს მისი წმინდანად შერაცხვის სურვილიც კი გაუჩნდეს.

სანამ მეგრულ-ხალხური ზეპირსიტყვიერება თავის სათქმელს იტყვის, მანამდე „დაიცავი საქართველოს“ ერთ-ერთმა ლიდერმა კახა მიქაიამ აღმაშენებლის სადარ პრეზიდენტს ერთი „მოკრძალებული“ ფრაზა მიუძღვნა: „არჩევნებისთვის მზა მითი-მიშა მეგრელთა დავითი!“

presa.ge