საქართველოს პრეზიდენტი მიხეილ სააკაშვილი ტელეკომპანია “კავკასიაში” მომხდარ ინციდენტს ჟურნალისტებზე თავდასხმად აფასებს და აცხადებს, რომ ამგვარი თავდასხმები და ექსტრემიზმის ნებისმიერი გამოვლინება დაუშვებელია. პრეზიდენტის პოზიცია დღეს ჟურნალისტებს პრეზიდენტის პრესსპიკერმა, მანანა მანჯგალაძემ გააცნო.

“პრეზიდენტმა გუშინვე გასცა მითითება, რომ სამართალდამცავმა ორგანოებმა ყველა დეტალი ბოლომდე დაადგინონ, გამოავლინონ ყველა ის პირი, ვინც ჟურნალისტებზე თავდასხმაში, ტელეკომპანიის დარბევაშია დამნაშავე და ყველა მათგანი დაისაჯოს”, – აღნიშნა მანანა მანჯგალაძემ. მისივე თქმით, პრეზიდენტი აცხადებს, რომ კონსტიტუციის წინაშე ყველა მოქალაქე თანასწორია; ამასთან, პრეზიდენტი გმობს თავდასხმას და ექსტრემიზმის ყოველგვარ გამოვლინებას.

“ნამდვილი დემოკრატია მხოლოდ კანონის პატივისცემის პირობებშია შესაძლებელი”, – განაცხადა მანანა მანჯგალაძემ.

ტელეკომპანია “კავკასიის” ეთერში წიგნის – “საიდუმლო სირობის” შესახებ გამართული დებატები წუხელ ჩხუბში გადაიზარდა. გადაცემის მონაწილეებს, “მართლმადიდებელ მშობელთა კავშირისა” და “სახალხო მართლმადიდებელ მოძრაობის” წევრებს შორის ფიზიკური დაპირისპირება მოხდა. ფიზიკური შეურაცხყოფა მიაყენეს ტელეკომპანიის ხელმძღვანელ დავით აქუბარდიას და “კავკასიის” სხვა თანამშრომლებსაც.

ტელეკომპანია “კავკასიაში” მობილიზებული იყო პოლიცია. დაკავებულია 8 ადამიანი.